www.rabita.az saytı yeni tərtibatda fəaliyyətə başlayıb

6.03.13

Rabitə və İnformasiya Texnologiyaları Nazirliyinin (RITN) Məlumat Hesablama Mərkəzinin (MHM) rəsmi internet saytı (www.rabita.az/) yeni tərtibatda fəaliyyətə başlayıb. 

Strukturu daha da təkmilləşdirilən sayta yeni funksional bölmələr əlavə edilməklə, ən son internet texnologiyaları əsasında mükəmməl dizayn hazırlanıb. Məlumat verilməsi və naviqasiya rahatlığı məqsədi ilə Azərbaycan, rus və ingilis dili versiyalarında işləyən sayt alt kateqoriyalı 5 əsas menyuya bölünüb. "Haqqımızda", "Xidmətlər", "Layihələr", "İnformasiya", "Media" kimi bölmələrin yer aldığı sayt istifadəçiləri daha çox maraqlandıran məlumatlarla zənginləşdirilib.

Məsələn, "Xidmətlər" bölməsinə VPN xidməti – "IP MPLS" (Multi Protocol Label Switching) texnologiyası əsasında virtual özəl şəbəkələrin yaradılması; şəhərlərarası, beynəlxalq və lokal danışıqların qeydiyyatı, MHM-ə ötürülməsi və emal prosesi; korporativ sifarişçilər üçün informasiya texnologiyaları sahəsində kompleks həllərin yaradılmasını, müəssisə və ya şirkətin biznes-prosesləri üzrə fəaliyyətini cəmləşdirən avtomatlaşdırılmış mürəkkəb və ahəngləşdirilmiş sistemlərin işlənib hazırlanmasını əhatə edən "Sistem inteqrasiyası";

Məlumat Hesablama Mərkəzinin layihələri haqqında vətəndaşların suallarının operativ şəkildə cavablandırılmasını təmin edən 157 çağrı xidməti barədə geniş məlumatlar daxil edilib.Həmçinin proqram və internet səhifələrinin sadə və rahat olmasına diqqət yetirən MHM müştərilərinin ehtiyaclarına uyğun xüsusi proqramlar da hazırlayır ki, bu xidmətlə bağlı məlumatları da sözügedən bölmədən əldə etmək mümkündür.

Saytın "Layihələr" bölməsində isə informasiya cəmiyyəti quruculuğunun mühüm elementləri olan "Elektron hökumət""Elektron imza",  milli informasiya və kommunikasiya infrastrukturunun potensialının artırılması məqsədi daşıyan "AzDataCom" şəbəkəsinin yaradılması layihəsi, Dövlət İnformasiya Ehtiyatlarının və Fərdi Məlumatların İnformasiya Sistemlərinin Dövlət Reyestri ilə bağlı bütün məlumatlar əks olunub.

Eyni zamanda saytda "Elektron hökumət" portalına keçid, elektron imza alınması ilə bağlı təlimatlar, eləcə də istifadəçilər üçün mərkəzin sosial şəbəkələrdəki səhifələrinə keçidlər yerləşdirilib.  Bununla da istifadəçilər sözügedən prosesləri 
www.rabita.az üzərindən də həyata keçirə bilərlər. Bu da istifadəçilərin elektron xidmətlərdən istifadəsinin asanlaşdırılması və bu xidmətlərdən istifadənin genişləndirilməsi üçün daha bir addımdır.